ಗಜಲ್ 21

ಏಸೋ ದಿನಗಳ ಕಳೆದೆನು ಸುಮ್ಮನೆ ಈಗಲಾದರೂ ನಗುವೆನು ನೋಡು
ಬತ್ತಿದ ಕೊಳದೊಳು ಈಜುವ ಕನಸನು ಸುಮ್ಮನೇನೆ ಕಂಡಿರುವೆನು ನೋಡು

ತುಂಬಿದ ಊರೊಳು ಒಂಟಿ ಈ ಜೀವನ ಯಾತಕಾದರು ಕಳೆದೆನೊ ಕಾಣೆ
ಬರಿಯ ಬಯಲಲಿ ಒಂದೆ ಕಾಲಿರುವುದು ಹರಿದ ಗಂಟಲಲೆ ಕೂಗುತಿಹೆನು ನೋಡು

ಒಣಗಿದ ಮರದಡಿ ಜೊಂಪೊಡೆಯುವ ಮನವಿದು ಯಾರಿಗೆ ಕಾದಿದೆಯೊ
ಕಾಯುವಿಕೆಯ ನಡೆಗೆಲ್ಲಿದೆ ಕೊನೆಯು ಏನನು ಬಯಸದೆ ಹಾಡುವೆನು ನೋಡು

ಗೋಳಿಡಿದಿದೆ ಈ ಒಣಗಿದ ಎಲುಬು ಜಾರಿದೆ ಹನಿಹನಿ ಕಂಬನಿಯು
ತೊಪ್ಪನೆ ಬೀಳುವ ಸದ್ದಿಗೆ ಹೆದರದೆ ಕೂತಿರುವ ಈ ಪರಿಯನು ನೋಡು

ತುಂಬು ಹೃದಯದ ತುಂಬಾ ನೋವಿದೆ ಘಳಿಗೆಘಳಿಗೆಗೂ ಪೂರಾ ನೊಂದಿದೆ
ನೋವನೆ ಉಣ್ಣುವ 'ರಾಜ'ನೆ ಕೇಳು ನೋವಿನಲ್ಲೂ ನಾ ನಗುವೆನು ನೋಡು.