ನನ್ನ ನಾದ

ನನ್ನ ನಾದ

ಬಟ್ಟಲು ಬಾನಡಿ ಹೊಸೆದಾ ಕನಸಿಗೆ
ಖಾತರಿ ಎಲ್ಲಿದೆಯೋ
ಬಣ್ಣದ ಕನಸನು ಕಂಡೊಡೆ ಇರುಳಲಿ
ಘಮ್ ಘಮ್ಮೆನ್ನುವುದೋ

ಹಳೆ ಡಾಂಬರಿನ ಕರಿಬಣ್ಣದಲಿ
ನೆನಪಿನ ಹೊಂಡವಿದೆ
ಎಡವುತ ಧೊಪ್ಪನೆ ಕಾಲ್ಜಾರಿದರೆ
ನೋವದು ಮಾಸುವುದೆ

ಕತ್ತಲೆಯೊಳಗೆ ಬೆತ್ತಲು ಹುಡುಕುವ
ಪುಕ್ಕಲು ನಾನಿಲ್ಲಿ
ಇಕ್ಕೆಲಗಳಲಿ ಫಕ್ಕನೆ ಸಿಕ್ಕುವ
ಬೆಳಕಿಗೆ ನೆಲೆಯೆಲ್ಲಿ

ಎತ್ತಣ ನೀನೋ ಎತ್ತಣ ನಾನೋ
ಲೆಕ್ಕಕೆ ಸಿಕ್ಕದಿದು
ಎಣ್ಣೆಯ ಹೊಯ್ದು ದೀಪವ ಉರಿಸುವೆ
ತಳಕೇ ಬೆಳಕಿರದು

ಅವಳಾ ಕಣ್ಣೊಳು ಕನಸನು ಕೆತ್ತಲು
ನನ್ನನೆ ಒಪ್ಪಿಬಿಡಿ
ಕೆತ್ತುತ ಕೆತ್ತುತ ಸತ್ತೇ ಹೋದರು
ಸಮ್ಮನೆ ಇದ್ದುಬಿಡಿ

ಗೆಜ್ಜೆಯ ಕಟ್ಟಿ ಕುಣಿಯುವ ಆಸೆ
ಅವಳು ಒಲಿದ ದಿನ
ಕುಣಿದೇ ಕುಣಿವೆ ಸದ್ದನು ಮಾಡಿ
ಧೀಂತ ಧೀಂತ ಧಿರನ

ರಾಶೇಕ್ರ