ದೀಪದಡಿಯ ಕಕ್ಕಸು

ಮೋರಿಯಲಿ ಸಿಕ್ಕ ನೈಂಟಿ ಬಾಟಲೊಳಗೆ
ಪಡಿತರ ಸೀಮೆಎಣ್ಣೆ
ಅಪ್ಪನ ಹರಿದ ಪಂಚೆಯ ಬತ್ತಿ
ಮೇಲುರಿದ ಉರಿಯಷ್ಟೇ ಭಗವಂತ

ಸುಯ್ಯನೆ ಬಂದು ಟಪ್ಪನೊಡೆದು
ಬಿದ್ದ ಹುಳದ ದಿಗಿಲಿಗೆ ಹೊರಬಿದ್ದ ಕಕ್ಕಸು
ಕೈಗಂಟಿ ಬಾಯಿಗೆ ರುಚಿ ಹತ್ತುತ್ತದೆ
ನಿನ್ನದೇ ನೆನಪುಗಳ ಡೈರಿಯ ಪೇಜು ತಿರವಿದಾಗ

ಉರಿವ ದೀಪದ ಜ್ವಾಲೆ
ನಿನ್ನಂತೆ ನಿಯತ್ತಿಲ್ಲ ಅದಕ್ಕೂ
ಹೊತ್ತು ನಿಂತ ಗೋಡೆಯ ಮೂತಿಗೆ ಮಸಿ ಬಳಿದು
ಚಿತ್ತಾರವೆನ್ನುತ್ತದೆ ಫಕ ಫಕನೆ ನಗುತ್ತದೆ

ಹೀಗೆ ಎಂಥೆಂಥವೋ ಇಣುಕುತ್ತವೆ
ನೀನಿರದ ಸರಕಾರದಿ
ತಿಳಿಗಾಳಿಯ ನೆಪ ಮಾಡಿ
ಕರೆಂಟು ತೆಗೆದ ಹೊತ್ತಿನಲಿ

.......ರಾಶೇಕ್ರ