ಗಜಲ್ 10
ಬಿಳಿಯ ಖಾಲಿ ಹಾಳೆಯೊಳಿನ ಕೊಳಕು ಭಾಷೆಯಲ್ಲ ಹಾಡು
ದಿನಗಟ್ಟಲೆ ಹುಡುಕಿ ಬರೆದ ಕಠಿಣ ಪದಗಳಲ್ಲ ಹಾಡು
ಪುರ್ರಂತ ಹಾರಿ ಬಂದು ಚಿಗುರಿದೆಲೆಯ ಪ್ರಾಣ ಕಂಡು
ಕತ್ತನೆತ್ತಿ ಕೆಮ್ಮಿದರೂ ಅಲ್ಲಿ ಹುಟ್ಟಲಿಲ್ಲ ಹಾಡು
ಎಳೆ ಪೈರಿನ ಮೇಲೆ ಬಿದ್ದ ಬೆಳಗ ನೀರ ಹನಿಯ ಮೇಲೆ
ಸೂರ್ಯರಶ್ಮಿ ಕಣ್ಣು ತೆರೆದರಲ್ಲಿ ಸುಳಿಯಲಿಲ್ಲ ಹಾಡು
ದೇಹ ವೀಣೆ ತಂತಿ ಎಲುಬು ಸತತ ಅದನೆ ಮೀಟಿ ಮೀಟಿ
ಎಷ್ಟು ಹೊತ್ತು ಕಾದರೂನು ಸುಲಭಕೊದಗಲಿಲ್ಲ ಹಾಡು
ಅಲಂಕಾರ ದುಷ್ಟಾಂತ ಛಂದಸ್ಸುಗಳನೆಳೆಮಾಡಿ
ಎಳೆಎಳೆಯಾಗೆಳೆದರೂನು ಯಾಕೊ ಬರಲೆ ಇಲ್ಲ ಹಾಡು
ಮಳೆಯಮೋಡ ಬೀಸುಗಾಳಿ ಋತುಮಾನಕೆ ಪಕ್ವವಾಗಿ
ಕಾಲಕಾಲಕೊದಗಿ ರೈತ ಬೆಳೆದ ಬೆಳೆಯಲಿಲ್ಲ ಹಾಡು
ಪ್ರಾಣ ಕೊಂದು ಚರ್ಮಸುಲಿದು ಸೂಜಿದಾರದಿಂದ ಹೊಲಿದು
ತಮಟೆ ಮಾಡಿ ಟಪಟಪನೆ ಹೊಡೆದ ಹೊಡೆತವಲ್ಲ ಹಾಡು
ನಾನು ನರನು ನೀನು ಪ್ರಾಣಿ ಎನುತ ಒಣದ ಜಂಬದಲ್ಲಿ
ಪಾಪದಿಲಿಯ ಕೊಂದು ತಿಂದ ಹಲ್ಲಿನೊಳಗೆ ಸಲ್ಲ ಹಾಡು
ಕತ್ತಲಲ್ಲಿ ದೇಹ ಬೆಸೆದು ಬೆವರ ಹರಿಸಲಿಲ್ಲ ಹಾಡು
ಗರ್ಭದೊಳಗೆ ಅಂಟು ಮೊಳೆತು ಭ್ರೂಣವಾದರಲ್ಲ ಹಾಡು
ಕೆಂಪು ಕಣ್ಣ ಕೋಗಿಲೆಗಳು ಮಾಮರದ ತುದಿಗೆ ಕೂತು
ಪೈಪೋಟಿಯನ್ನೊಡ್ಡಿಕೊಂಡು ಕೂಗೊ ಕೂಗಲಿಲ್ಲ ಹಾಡು
ಎದೆನಡುಕ ತುಟಿಯ ನಡುಕ ಕಂಡುಕೊಂಡ ಫಕೀರನಿಗೆ
ದೇಹ ನೀಡಿ ಪಡೆದು ಬಸಿರ ಉಸಿರನೆಳೆದರಲ್ಲ ಹಾಡು
ಈಚೀಚೆಗೆ ಹೆರಿಗೆಯಾಗಿ ಬಿಸಿಲ ಕಂಡ ಎಳೆಯ ಮಗುವ
ಮೊಲೆಯ ಚೀಪಿ ಹಾಲುಕುಡಿದ ತುಟಿಯ ಮೃದುವಲಿಲ್ಲ ಹಾಡು
ಗಂಟಲೊಳಗೆ ನೀರನಿಳಿಸಿ ಗೊಟಗೊಟಾಂತ ಗುಟುಕರಿಸುತ
ಗಂಪು ಕಟ್ಟಿಕೊಂಡು ಕೂತು ಉಸಿರಿದುಸಿರು ಅಲ್ಲ ಹಾಡು
ವಿರಹ ತಣಿಸಲೆಂದು ಬಂದ ಇನಿಯನೊಳಗೆ ಇರದ ಸಲಿಗೆ
ಇರುವುದೆಂದೆ ಎಳೆದು ಎಳೆದು ತಬ್ಬಿಕೊಂಡರಲ್ಲ ಹಾಡು
ನೀಲಿ ಬಾನ ಮೋಡವೊಂದು ಭೂಮಿಯತ್ತ ದೃಷ್ಟಿನೆಟ್ಟು
ಬುಳಬುಳಾಂತ ಹರಿದರಲ್ಲಿ ಮೊಳಕೆಯೊಡೆಯಲಿಲ್ಲ ಹಾಡು
ಎಲುಬಿನೂರ ಹೇ'ರಾಜ' ಅಂದವಿರದ ಸಖಿಯ ಕರೆದು
ಎಳೆದೆಳೆದು ಮುತ್ತನಿಟ್ಟ ಖಾಲಿ ಎದೆಯಲಿಲ್ಲ ಹಾಡು
ರಾಶೇಕ್ರ
ಬಿಳಿಯ ಖಾಲಿ ಹಾಳೆಯೊಳಿನ ಕೊಳಕು ಭಾಷೆಯಲ್ಲ ಹಾಡು
ದಿನಗಟ್ಟಲೆ ಹುಡುಕಿ ಬರೆದ ಕಠಿಣ ಪದಗಳಲ್ಲ ಹಾಡು
ಪುರ್ರಂತ ಹಾರಿ ಬಂದು ಚಿಗುರಿದೆಲೆಯ ಪ್ರಾಣ ಕಂಡು
ಕತ್ತನೆತ್ತಿ ಕೆಮ್ಮಿದರೂ ಅಲ್ಲಿ ಹುಟ್ಟಲಿಲ್ಲ ಹಾಡು
ಎಳೆ ಪೈರಿನ ಮೇಲೆ ಬಿದ್ದ ಬೆಳಗ ನೀರ ಹನಿಯ ಮೇಲೆ
ಸೂರ್ಯರಶ್ಮಿ ಕಣ್ಣು ತೆರೆದರಲ್ಲಿ ಸುಳಿಯಲಿಲ್ಲ ಹಾಡು
ದೇಹ ವೀಣೆ ತಂತಿ ಎಲುಬು ಸತತ ಅದನೆ ಮೀಟಿ ಮೀಟಿ
ಎಷ್ಟು ಹೊತ್ತು ಕಾದರೂನು ಸುಲಭಕೊದಗಲಿಲ್ಲ ಹಾಡು
ಅಲಂಕಾರ ದುಷ್ಟಾಂತ ಛಂದಸ್ಸುಗಳನೆಳೆಮಾಡಿ
ಎಳೆಎಳೆಯಾಗೆಳೆದರೂನು ಯಾಕೊ ಬರಲೆ ಇಲ್ಲ ಹಾಡು
ಮಳೆಯಮೋಡ ಬೀಸುಗಾಳಿ ಋತುಮಾನಕೆ ಪಕ್ವವಾಗಿ
ಕಾಲಕಾಲಕೊದಗಿ ರೈತ ಬೆಳೆದ ಬೆಳೆಯಲಿಲ್ಲ ಹಾಡು
ಪ್ರಾಣ ಕೊಂದು ಚರ್ಮಸುಲಿದು ಸೂಜಿದಾರದಿಂದ ಹೊಲಿದು
ತಮಟೆ ಮಾಡಿ ಟಪಟಪನೆ ಹೊಡೆದ ಹೊಡೆತವಲ್ಲ ಹಾಡು
ನಾನು ನರನು ನೀನು ಪ್ರಾಣಿ ಎನುತ ಒಣದ ಜಂಬದಲ್ಲಿ
ಪಾಪದಿಲಿಯ ಕೊಂದು ತಿಂದ ಹಲ್ಲಿನೊಳಗೆ ಸಲ್ಲ ಹಾಡು
ಕತ್ತಲಲ್ಲಿ ದೇಹ ಬೆಸೆದು ಬೆವರ ಹರಿಸಲಿಲ್ಲ ಹಾಡು
ಗರ್ಭದೊಳಗೆ ಅಂಟು ಮೊಳೆತು ಭ್ರೂಣವಾದರಲ್ಲ ಹಾಡು
ಕೆಂಪು ಕಣ್ಣ ಕೋಗಿಲೆಗಳು ಮಾಮರದ ತುದಿಗೆ ಕೂತು
ಪೈಪೋಟಿಯನ್ನೊಡ್ಡಿಕೊಂಡು ಕೂಗೊ ಕೂಗಲಿಲ್ಲ ಹಾಡು
ಎದೆನಡುಕ ತುಟಿಯ ನಡುಕ ಕಂಡುಕೊಂಡ ಫಕೀರನಿಗೆ
ದೇಹ ನೀಡಿ ಪಡೆದು ಬಸಿರ ಉಸಿರನೆಳೆದರಲ್ಲ ಹಾಡು
ಈಚೀಚೆಗೆ ಹೆರಿಗೆಯಾಗಿ ಬಿಸಿಲ ಕಂಡ ಎಳೆಯ ಮಗುವ
ಮೊಲೆಯ ಚೀಪಿ ಹಾಲುಕುಡಿದ ತುಟಿಯ ಮೃದುವಲಿಲ್ಲ ಹಾಡು
ಗಂಟಲೊಳಗೆ ನೀರನಿಳಿಸಿ ಗೊಟಗೊಟಾಂತ ಗುಟುಕರಿಸುತ
ಗಂಪು ಕಟ್ಟಿಕೊಂಡು ಕೂತು ಉಸಿರಿದುಸಿರು ಅಲ್ಲ ಹಾಡು
ವಿರಹ ತಣಿಸಲೆಂದು ಬಂದ ಇನಿಯನೊಳಗೆ ಇರದ ಸಲಿಗೆ
ಇರುವುದೆಂದೆ ಎಳೆದು ಎಳೆದು ತಬ್ಬಿಕೊಂಡರಲ್ಲ ಹಾಡು
ನೀಲಿ ಬಾನ ಮೋಡವೊಂದು ಭೂಮಿಯತ್ತ ದೃಷ್ಟಿನೆಟ್ಟು
ಬುಳಬುಳಾಂತ ಹರಿದರಲ್ಲಿ ಮೊಳಕೆಯೊಡೆಯಲಿಲ್ಲ ಹಾಡು
ಎಲುಬಿನೂರ ಹೇ'ರಾಜ' ಅಂದವಿರದ ಸಖಿಯ ಕರೆದು
ಎಳೆದೆಳೆದು ಮುತ್ತನಿಟ್ಟ ಖಾಲಿ ಎದೆಯಲಿಲ್ಲ ಹಾಡು
ರಾಶೇಕ್ರ
No comments:
Post a Comment